Mkuu wa Mkoa wa Morogoro Mhe. Loata Sanare, anawatangazia Watu wote wa ndani na nje ya nchi kuwekeza katika Mkoa wa Morogoro.
Maeneo ya kipaumbele katika uwekezaji huo ni pamoja na uanzishaji wa Kilimo cha kibiashara, Viwanda vya usindikaji wa mazao ya kilimo, Uanzishwaji wa Viwanda vikubwa, Utalii, Uchimbaji wa Vito na Madini na viwanda vya kusindika nyama.
Sababu za wazi zinazovutia kuwekeza Mkoani Morogoro ni pamoja na, Mkoa wa Morogoro umejaliwa kuwa na fursa na mazingira mazuri ya Uwekezaji, Uwepo wa rasilimali nyingi za asili ambazo bado hazijatumika ipasavyo, Uwepo wa nguvukazi ya kutosha inayojituma na hali ya hewa nzuri inayoruhusu kufanyika kwa shughuli za kiuchumi.
Sababu nyingine ni Mkoa wa Morogoro kuwa kimkakati zaidi kijiografia kutokana na mahali ulipo katika barabara Kuu ya kutoka Mikoa ya mashariki kwenda Mikoa ya Magharibi na nyanda za juu Kusini.
Aidha,Mkoa unapitiwa na Reli Kuu mbili za Reli ya KATI na TAZARA na hivyo kurahisisha usafirishaji. Mkoa kuwa katikati ya Makao Makuu ya nchi (Dodoma) na Mji wa kibiashara wa Dar es Salaam na hivyo kutengeneza fursa za kibiashara
Uwepo wa Vivutio vingi vya Utalii ni sababu nyingine ya kivutio. Vivutio hivyo ni kuwepo na mbuga za wanyama za Mikumi, Udzungwa, Selous na maeneo mengine ya asili yanayovutia shughuli za uendeshaji wa mahoteli ya kitalii, maporomoko ya maji, nyanzo vya maji na wanyama na ndege wa aina mbalimbali ambao wengine hawapo kabisa maeneo mengine Duniani.
Serikali ya Mkoa wa Morogoro imejipanga kuhakikisha kwamba wale watakaoonesha nia ya kuwekeza katika Mkoa wa Morogoro wanafanikiwa kutekeleza malengo yao kwa amani na utulivu.
Kwa mawasiliano zaidi wasiliana na Dawati la uwekezaji Mkoa wa Morogoro
