KAZI YANGU YA KWANZA NI KUHAKIKISHA KUWA MOROGORO INAKUWA NA MISINGI YA AMANI - MHE. ADAM MALIMA, RC MORORORO

Posted on: May 27th, 2023

Mkuu wa Mkoa wa Morogoro Mhe. Adam Kighoma Malima amesema kazi yake ya kwanza kama Mkuu wa Mkoa huo ni kuhakikisha kuwa kuna Amani na Utulivu ndani ya Mkoa huo kwa ajili ya wanamorogoro pamoja na wawekezaji wanaotamani kuja kuwekeza ndani ya Mkoa huo.

Mhe. Kigoma Malima amesema hayo Mei 26, 2023 wakati wa kikao cha kujitambulisha kwa Wajumbe wa Sekretarieti ya Mkoa huo kilichofanyika katika Ukumbi wa Ofisi ya Mkuu wa Mkoa wa Morogoro ikiwa ni mara yake ya kwanza kufanya kikao na wajumbe hao tangu alipoteuliwa na Mhe. Dkt. Samia Suluhu Hassan wiki moja iliyopita kushika nafasi hiyo.

Mhe. Adam Malima Mkuu wa Mkoa wa Morogoro akizungumza na wajumbe wa Sekretarieti ya Mkoa kwenye kikao cha kujitambilisha.

Amesema, jukumu lake la kwanza kama Mkuu wa Mkoa ni kulinda Amani na Utulivu viwepo hivyo wananchi kuendelea kufanya kazi zao za uzalishaji mali kwa Amani na utulivu lakini pia Amani hiyo itawezesha wawekezaji kuvutiwa kuja kuwekeza ndani ya Mkoa wa Morogoro

“Kwa hiyo, kazi yangu ya kwanza ni kuhakikisha kwamba Morogoro ina misingi ya AMANI na UTULIVU inayoongoza wananchi kufanya kazi zao ” amebainisha Mhe. Adam Malima.

Aidha, amesema jukumu lake la pili ni kusimamia maendeleo ya wananchi wa Morogoro na ya Serikali kwa ujumla kwa kuangalia na kushauri utekelezaji wa miradi hiyo ya Serikali inayotekelezwa ndani ya Mkoa huo.

Wajumbe wa Sekretarieti ya Mkoa wakimsikiliza Mhe. Adam Malima Mkuu wa Mkoa wa Morogoro.

Hata hivyo, amesema ili kutekeleza majukumu hayo makubwa ushirikiano unahitajika, kwa kuwa peke yake hawezi kukamilisha azma hizo za Mkoa na Serikali ya awamu ya sita, isipokuwa ni kwa kufanya kazi kama timu.

Kwa sababu hiyo, amewataka Wajumbe wa Kamati ya Ulinzi na Usalama pamoja na Wajumbe wa Sekretarieti ya Mkoa huo kumpa ushirikiano  unaohitajika ili aweze kutekeleza majukumu hayo na mengine kwa kuwa peke yake hawezi kufanikiwa.

Akisisitiza suala la ushirikiano amesema kwenye suala la Amani, Wajumbe wa kamati ya Ulinzi na Usalama watatakiwa kumpa ushirikiano wa kutosha ili kuendelea kudumisha  Amani ya Mkoa huo na kwa upande wa usimamiaji wa miradi ya maendeleo Wajumbe wa Sekretarieti ya Mkoa na wanatakiwa kuwajibika kutoa ushirikano huo kwake.

Kwa upande wake Katibu Tawala wa Mkoa huo Dkt. Mussa Ali Mussa amewataka wajumbe wa Sekretarieti ya Mkoa huo kubadilika na kufanya kazi kulingana na wakati na mazingira yaliyopo badala ya kuendeleoa kufanya kazi kwa mazoea.

Aidha, amewataka Wajumbe hao kuwa na desturi ya kuwasiliana baina ya idara moja na idara nyingine katika utekelezaji wa majukumu yao jambo ambalo amesema bado ni changamoto katika taasisi hiyo.

MWISHO