RC AANZA ZIARA YA KIKAZI,

Posted on: September 12th, 2022

RC Morogoro aanza ziara rasmi ya kikazi na kujitambulisha

Mkuu wa Mkoa wa Morogoro Fatma Abourbakar Mwassa ameanza rasmi ziara ya kujitambulisha kwa wananchi wa Mkoa huo katika Halmashauri zote tisa (9) za Mkoa huo lengo likiwa ni kuutambua vema Mkoa, kutambua changamoto zinazowakabili wananchi na kutambua miradi ya maendeleo inayotekelezwa na Serikali.

Mkuu wa Mkoa wa Morogoro Fatma Mwassa alipofika katika mradi wa kituo cha kusukuma maji cha Kihonda

Fatma Mwassa ameanza ziara hiyo leo Septemba 12 katika Halmashauri ya Manispaa ya Morogoro ikiwa ni mara yake ya kwanza kufanya ziara ya aina hiyo tangu alipoapishwa kushika wadhifa huo Agosti Mosi mwaka huu.

Mkurugenzi wa Halmashauri ya Manispaa Ally Machela (katikati) akitoa maelezo kwa Mkuu wa Mkoa wa Morogoro, alipotembelea miradi ya maendeleo iliyopo katika halmashauri hiyo

Akiwa katika Halmashauri hiyo Mkuu huyo wa Mkoa ametembelea miradi ya Maendeleo nane(8) ukiwemo mradi wa Shule ya Sekondari ya Boma yenye gorofa mbili Kituo cha Afya cha Tungi, Kituo cha Afya cha Lukobe, Shule ya Sekondari ya Lukobe, Hospitali ya Halamshauri ya Manispaa pamoja na Shule ya sekondari ya Mindu.

Jengo la shule ya Sekondari Mtaa wa Boma

Miradi mingine aliyoitembelea ni ya Ujenzi wa Barabara ya Manzimbu inayojengwa na wakala wa Barabara Mjini na Vijijini (TARURA) na ujenzi wa kituo kipya cha kusukuma maji eneo la Kihonda Mizani ambalo hadi kukamilika kwake litagharimu shilingi 593 Mil.

Akiwa katika Mradi wa ujenzi wa Tanki la Maji Kihonda Fatma Mwassa amewataka wananchi wa Mkoa huo kutoharibu vyanzo vya maji kwa kuchungia mifugo katika maeneo hayo ya vyanzo vya maji na kutokukata miti karibu na maeneo hayo jambo ambalo amesema hatolivumilia kamwe.

Mkuu wa Wilaya ya Morogoro Albert Msando (mwenye suti Nyeusi ) pamoja na Mkuu wa Mkoa wakisikiliza kwa makini maelezo yanayotolewa na wataalamu kwenye miradi ya maendeleo waliyoitembelea

Shule ya Sekondari ya Lukobe Halmashauri ya Manispaa ya Morogoro

Akisisitiza zaidi kuhusu utunzaji wa vyanzo vya maji Fatma Mwassa amewataka wanasiasa wakiwemo Waheshimiwa. Madiwani wa Halmashauri ya Manispaa hiyo kuungana pamoja kukemea mwananchi yeyote anayeharibu vyanzo vya maji kwa kuwa maji ni uhai na kutumia fursa hiyo kuwataka waheshimiwa. Madiwani kuacha “siasa nyepesi”.

“Mimi niwaombe sana Waheshimiwa. Madiwani wangu, tusifanye siasa nyepesi nyepesi, kwenye suala la maji sheria lazima  ichukue mkondo wake vinginevyo hakutakuwa na sababu ya sisi kuwepo....”amesema Fatma Mwassa

Amesema upatikanaji wa Maji kwa Manispaa ya Morogoro ni 48% lakini serikali imeelekeza upatikana wa maji Mijini ni 98%, hii haimaanishi Serikali haijafanya kazi yake kuwapelekea wananchi maji la hasha, Serikali imeweka miundombinu ya maji ya kutosha takribani kila eneo changamoto ni uhaba wa maji yenyewe kunakotokana na uharibufu wa vyanzo vya maji kunakofanywa na wananchi wachache wasioitakia mema nchi hii.

Akitoa maelezo ya mradi huo, Mkurugenzi wa Mamlaka ya maji Safi na Usafi wa Mazingira Morogoro (MORUWASA) Mhandisi Tamimu Katakwebe amemweleza Mkuu wa Mkoa kuwa tanki hilo la maji linalojengwa  kwa shilingi 593.3 Mil. kwa fedha za Serikali amba[po kuna pampu mbili zenye uwezo wa kupandisha maji lita milioni 2 kwa saa 8 ambalo litanufaisha wakazi 120,000 wa kata za Kiegea, Mkundi na Mgulu wa Ndege.

Mkuu wa Mkoa Fatma Mwassa kesho Septemba 13 anaendelea na ziara katika Halmashauri hiyo ambapo anategemewa kuwa na Mkuatano na wananchim ili sikiliza kero zao na kuzitatua.

MWISHO