RC MALIMA ALIPONGEZA JESHI LA WANANCHI.

Posted on: February 4th, 2025

Mkuu wa Mkoa wa Morogoro Mhe. Adam Kighoma Malima amelishukuru  na kulipongeza jeshi la wananchi wa Tanzania (JWTZ) kupitia   shirika la Mzinga kwa kufanikisha zoezi la kutengeneza  kifaa saidizi (mguu bandia) chenye thamani ya shilingi milioni 2.5. Kwa ajili ya Mgonjwa aliyemuahidi kumpatia kifaa sqidizi hicho.

Mhe. Adam Kighoma Malima ametoa pongezi hizo Februari 4, 2025 wakati wa tukio la kumkabidhi kifaa saidizi (mguu bandia) Bw. Jackson Mwakalinga tukio lililofanyika katika viwanja vya Ofisi ya Mkuu huyo wa Mkoa.

Mhe. Malima amesema, kwa ushirikiano mkubwa na shirika la Mzinga wamefanikiwa kupata kifaa saidizi   kwa ndugu Jackson ikiwa ni ahadi ya Mkuu wa Mkoa huyo aliyoitoa Agosti 27, 2024 siku ya Maadhimisho ya miaka 60 ya JWTZ alipotoa ahadi ya kumpatia mgonjwa huyo kifaa saidizi cha kumsaidia kutembea.  

Aidha, Mkuu huyo wa Mkoa ametumia nafasi hiyo kulipongeza JWTZ kwa jitihada zinazofanywa na jeshi la wananchi hasa shirika la Mzinga Mkoani Morogoro kwa kutoa  huduma nzuri kwa jamii inayowazunguka zikiwemo huduma za afya.

“…nakushukuru sana Jenerali kwani hiki ni kielelezo cha umahiri na umakini wa jeshi la wananchi wa Tanzania maana jeshi ni jeshi wakati wa vita na ni jeshi hata wakati wa Amani..” Amesema Mhe. Adam Malima

Kwa upande wake Meneja Mkuu wa Shirika la Mzinga na Mkuu wa kikosi MAZAO, Brigedia Generali Seif Athuman Hamisi, akielezea historia ya Hospitali ya kikosi cha Mzinga amesema hospitali hiyo ilianza 1976 kama Zahanati  iliyokuwa inatoa huduma kwa maafisa wa Jeshi na hivi sasa ni hospital inayohudumia hata wananchi wa kawaida ngazi ya Wilaya kwa huduma tofauti kama vile utoaji wa huduma za vifaa saidizi kwa watu wenye ulemavu  wa viungo.

Naye, Bw. Jackson Mwakalinga  ambaye alikatwa mguu wake baada ya kushauriwa na madaktari ili kuokoa uhai wake amemshukuru Mkuu wa Mkoa kwa moyo wake wa kumpambania kupata kifaa hicho cha kumsaidia kutembea huku akilipongeza shirika la  Mzinga kwa kufanikisha upatikanaji wa kifaa hicho.

MWISHO.