RC Morogoro : Tunawajibu wa kujitoa tunapohitajika na nchi yetu

Posted on: July 26th, 2024

Mkuu wa Mkoa wa Morogoro Mhe. Adam Kighoma Malima amewataka watanzania wote kuwa wazalendo katika kujitoa kwa ajili ya nchi kama ilivyokuwa kwa mashujaa wetu wakiwemo mashujaa wa Morogoro waliopigana vita ya mwaka 1978-1979 dhidi ya Uganda.

Mhe. Malima amesema hayo Julai 25, mwaka huu wakati wa maadhimisho ya siku ya  mashujaa waliopoteza maisha yao wakitetea, kupigania na kulinda  uhuru wa Tanzania katika mnara wa mashujaa uliopo Manispaa ya Morogoro.

"...tunachofanya ni kukumbushana sote tunawajibu wa kujua kwamba tunapohitajika na taifa letu tunawajibu wa kujitoa kwa hali na mali na hata Maisha yetu kwa ajili kutetea uhuru na Taifa letu..." amesema Mhe. Malima

Aidha, Mhe. Malima amesema mashujaa hao walipambana kwa hali na mali kwa ajili ya kuitetea nchi ya Tanzania wakiwa katika maeneo mbalimbali wakiwemo mashujaa wa Morogoro kwani amesema, walijitoa  kwa uzalendo mkubwa kwa kuweka rehani maisha yao kwa ajili ya Taifa.

Kwa sababu hiyo, Mhe. Malima  ameungana na Kamati ya Ulinzi na Usalama pamoja na wananchi katika eneo la mnara wa mashujaa kuwakumbuka na kuwaombea kheri mashujaa hao ikiwa na ishara ya kujali na kudumisha misingi ya amani na utulivu katika kuendelea kuwaenzi vizazi na vizazi.

Hata hivyo, Mkuu huyo wa Mkoa amesema kumekuwa na misingi mizuri na imara iliyojengwa na waasisi wetu waTaifa hili wakiwemo Baba wa Taifa hayati Mwl.Julius Kambarage Nyerere na Sheikh Abeid Amani Karume ambao wamesababisha uzalendo hapa nchini na kuishi kwa amani na utulivu.

Kwa upande wake, Bw. Jackson Mzee Mkazi wa Lukobe amewasisitiza vijana kuwa na moyo wa kizalendo bila kujali malipo kama walivyojitolea mashujaa hao wanaokumbukwa hadi sasa kwani vijana ndio wenye kujenga Taifa.

Kila mwaka,Tanzania ina siku moja kwa ajili ya kuadhimisha siku ya Mashujaa waliopoteza Maisha yao wakiutetea, kuupigania na kulinda uhuru wa Tanzania.

Mwisho.