Halmashauri zatakiwa kukamilisha miradi ya maendeleo kwa wakati.

Posted on: December 20th, 2024

Mkuu wa Mkoa wa Morogoro Mhe. Adam Kighoma Malima amewataka Wakuu wa Wilaya na Wakurugenzi wa Halmashauri zote za Mkoa wa huo kuhakikisha wanasimamia na kukamilisha kwa wakati miradi yote ya maendeleo ikiwemo ya Afya, Elimu , Barabara, maji  na kuhakikisha wanasimamia vema suala la Lishe bora katika maeneo yao.

Adam Malima ametoa maagizo hayo Disemba 19, 2024 wakati akipokea taarifa ya Mradi Endelevu wa  Huduma za Maji na Usafi wa Mazingira Vijijini ( SRWSSP) na  taarifa ya Utekelezaji wa Shughuli za Lishe kwa Robo ya Kwanza Julai - Septemba katika ukumbi wa mikutano wa Ofisi ya  Mkuu wa Mkoa huo.

Aidha, amewataka Viongozi hao kuhakikisha wanakabiliana na magonjwa ya Mlipuko kama kipindupindu na kwamba maeneo yaliyothibitika yana ugonjwa wa Mlipuko watumie njia zote zinazoelekezwa na wataalam kuhakikisha wanatokomeza Ugonjwa huo  ikiwemo njia ya kutoa Elimu kwa Wananchi  namna ya kujikinga na kuchukua tahadhari ya magonjwa huo.

Kwa upande wake Katibu Tawala wa Mkoa Wa Morogoro Dkt. Mussa Ali Mussa amewataka viongozi hao kuhakikisha chakula kinachotolewa mashuleni kina kidhi haja kwa kufuata makundi yote ya chakula Bora na amewataka Wakuu wa Wilaya zote kuhakikisha wanasimamia Ulinzi na Usalama  kwa kipindi hiki cha kuelekea sikukuu za mwisho wa mwaka.

MWISHO.