KAMATI YA KUDUMU YA BUNGE YAIAGIZA ASA KUSAFISHA MASHAMBA.

Posted on: February 18th, 2025

Kamati ya Kudumu ya bunge  viwanda, biashara, kilimo na mifugo chini ya mwenyekiti wake Mhe. Deo Mwanyika (MB) imeiagiza  Wakala wa  Uzalishaji  na Usambazaji wa mbegu nchini (ASA) kusafisha mashamba ya  kuzalisha mbegu ambayo kwa sasa ni mapori ili yaweze kutumika na  kusaidia  kuongeza kasi ya uzalishaji wa mbegu na kukidhi mahitaji ya wakulima.

Agizo hilo limetolewa  Februari 18, 2025 na Mhe. Mwanyika ambaye ni mwenyekiti wa Ka ati hiyo ya kudumu wakati wa ziara ya  kutembelea Kituo cha ASA kilichopo Wilayani Kilosa Mkoani Morogoro.

Mhe. Mwanyika amesema, kutokana na kuwepo kwa   uhitaji  mkubwa wa   mbegu hapa  nchini ameitaka ASA kufufua mashamba ambayo yalikuwa yanatumika katika uzalishaji wa mbegu  ambayo yatasaidia katika uzalishaji wa mbegu na  kupunguza  uhitaji wa serikali kuagiza   mbegu  kutoka nje ya nchi.

"..Hatutaki kuona mashamba ya mbegu ambayo ni mapori" Amesisitiza Mhe. Deo Mwanyika.

Aidha kiongozi huyo ameitaka ASA kuhakikisha wanatunza miundombinu ya uzalishaji yakiwemo matrekta na vifaa vingine ili viweze kutumika kwa muda mrefu na kuleta faida kwa taifa la leo na hata la kizazi kijacho.

Kwa upande wake Naibu waziri wa kilimo Mhe. David Silinde  amesema  Serikali  inafanya jitihada ya kuhakikisha uzalishaji   wa mbegu unaongezeka ili kupunguza changamoto ya uhaba wa mbegu kwa wananchi ambapo kwa sasa mbegu zinaagizwa kutoka nje ya nchi hivyo amezitaka taasisi za uzalishaji mbegu na usambazaji kuongeza uzalishaji wa mbegu hizo hapa nchini.

Naye Mkuu wa Mkoa wa Morogoro Mhe. Adam Kighoma Malima  amekitaka kituo cha utafiti wa Mbegu Tanzania (TARI) kuendelea kufanya Tafiti mbalimbali za uzalishaji wa mbegu ili kuweza kuongeza uzalishaji wa mbegu katika maeneo mengi na kukidhi uhitaji wa mbegu kwa watanzania wote.

Ziara ya Kamati ya Kudumu ya Bunge viwanda, biashara, kilimo na mifugo itendelea na ziara yake Februari 19,2025 katika Halmashauri ya Mji ifakara.

MWISHO.