BILIONI 21.4 KUPUNGUZA ADHA YA MAJI GAIRO.

Posted on: July 24th, 2024

Waziri wa Maji Mhe. Jumaa Aweso amewahakikishia wananchi wa Gairo Mkoni Morogoro kuwa Serikali itatoa fedha za ujenzi wa mradi wa Chagongwe unaogharimu shilingi Billioni 21.14 na kwamba fedha hizo zitaletwa wakati ili kuhakikisha ujenzi unaanza na unakamilika kwa muda uliopangwa  ili wananchi wa Wilaya ya Gairo wapate maji safi na salama.

Mhe. Aweso ametoa kauli hiyo Julai 23, 2024 wakati akishuhudia utiaji saini wa  Mkataba wa ujenzi wa mradi wa Chagongwe ukihusisha Mamlaka ya Majisafi na Usafi wa Mazingira Gairo Mjini na Mkandarasi anayejulikana kama FABEC investment Ltd,  mradi huo utatekelezwa kwa kutoa maji kutoka Mto Chagongwe na kuyapeleka Gairo Mjini.

Kiongozi huyo amesema licha ya Nchi kuwa na maeneo mengi ambayo yanachangamoto ya maji lakini fedha hizo zimeletwa Wilayani Gairo ili kupunguza adha ya maji, ambapo amewahakikishia wanagairo  kuwa Serikali ya awamu ya sita itatafuta fefha hizo haraka na kumlipa Mkandarasi ili aanze kazi hiyo mapema.

"..Nataka niwahakikishie, leo tumesaini, sio tumesaini ili tuondoke, mkandarasi anatakiwa kupewa kianzio tutabana popote kuhakikisha fedha hii inatoka kwa wakati.." Amesisitiza Mhe. Aweso.

Katika hatua nyingine Mhe. Aweso amepiga marufuku kwa Mamlaka za Maji  kuwabambikia bili za maji wananchi ambazo sio sahihi, ambapo amesisitiza kulipa bili ya maji kulingana na mita inavyosoma, pia kushirikiana  na mwananchi wa mahali husika pindi msoma mita anapoenda kusoma ili kuepuka udanganyifu.

Kwa upande wake Mkurugenzi Mtendaji wa Mamlaka ya maji safi na Usafi wa Mazingira  Gairo Mjini (GUWASA ) Mhandisi. Felister Joseph amesema mradi huo unaogharama Shilingi Bilioni 21.14 unatarajia kukamilika  mwaka 2026 na utahudumia wakazi wapatao 156,000 wa Kata 11 za Chagongwe, Rubeho, Msingisi, Gairo, Magoweko, Ukwamani, Mkalama, Chigela, Kibedya, Chakwale na Madege.

MWISHO.