KAMATI YA TAMISEMI YAITAKA TARURA KUHARAKISHA UJENZI WA BARABARA YA KIWANGO CHA LAMI

Posted on: June 24th, 2023

Mwenyekiti wa Kamati ya Kudumu ya Bunge  Tawala za Mikoa na Serikali za Mitaa Mhe. Dennis Lazaro Londo ameutaka uongozi wa Wakala ya Barabara za Vijijini na Mijini (TARURA) kuharakisha ujenzi wa miundombinu ya barabara kwa maslahi mapana ya wananchi na kukuza uchumi wa Taifa.

Mhe. Londo amesema hayo Juni 24, 2023 akiwa ameambatana na wajumbe wa kamati hiyo wakati wa ziara ya kukagua  miradi ya miundombinu ikiwemo ya ujenzi wa barabara zinazotekelezwa katika Halmashauri za Manispaa ya Morogoro na  Morogoro vijijini Mkoani humo.

Amesema, ujenzi wa barabara ya Ngerengere - Mkulazi hadi Kidunda  yenye urefu wa kilometa 70.54 inayounganisha  vijiji vya kata za matuli, mkulazi-  na ngerengere imeondoa changamoto ya kukosa mawasiliano kwa wakazi wanaoishi katika maeneo hayo.

"... tuharakishe miundombinu ikiwemo Barabara hii ambayo ni uthibitisho wa Serikali  kuwaunganisha wananchi wetu kimawasilino ya shughuli za kiuchumi na kijamii zikiwemo shughuli za mashambani kwenda sokoni kwa ajili ya kupeleka mzao yao" amesema Mhe. Londo

Aidha, amepongeza maamuzi ya TARURA ya kujenga barabara katika maeneo yenye uhitaji mkubwa ili kuwakwamua wananchi kiuchumi hasa  wananchi wa Mkoa wa Morogoro, Pwani na Dar es Salaam.

Sambamba na maagizo hayo amempongeza Mhe. Rais wa Jamhuri ya Muungano wa Tanzania Mhe. Dkt. Samia Suluhu  Hassan kwa kuiongezea Bajeti TARURA kwani kwa mwaka wa fedha 2023/2024 Bajeti ya TARURA imeongezeka kwa Shilingi Bil.350

Kwa upande wake Naibu Katibu Mkuu Ofisi ya Rais TAMISEMI (Miundombinu) Mhandisi Rogatus Mativila ameishukuru Kamati hiyo na kuahidi kuendelea kuisimamia TARURA pamoja na kuyafanyia kazi maelekezo ya kamati na ushauri walioutoa kwa maslahi mapana ya wananchi.

Kwa upande wake, Mkuu wa  Wilaya ya Morogoro Mhe. Rebecca Nsemwa kwa niaba ya  Mkuu wa Mkoa wa Morogoro Mhe. Adam Kighoma Malima ameishukuru kamati hiyo kufanya ziara Wilayani humo na kwa niaba ya watendaji wa Serikali Wilayani humo amesema ameyapokea maelekezo ya Kamati hiyo na watayatekeleza.

Kamati hiyo imehitimisha ziara yake Mkoani Morogoro ambapo miradi mbalimbali imekaguliwa ukiwemo ujenzi wa Daraja la Berega la Wilayani Kilosa lenye urefu wa mita 140.

MWISHO