KAMISHNA MSAIDIZI MKOA WA MOROGORO AELEKEZA WANANCHI NA VIONGOZI WA VIJIJI KUTOUZA KIHOLELA ARDHI ZA VIJIJI.

Posted on: October 7th, 2024

Watendaji wa Vijiji, Vitongoji, Wenyeviti, na Wajumbe wa mabaraza ya Serikali za Vijiji wametakiwa kuacha tabia ya kuuza maeneo kiholela kwa wananchi, ili kuepusha migogoro inayochafua sifa ya Serikali.

Rai hiyo imetolewa Oktoba 5, 2024 na Kamishna Msaidizi wa Ardhi wa Mkoa wa Morogoro Bw. Idrisa Kayera, alipofika kwenye mashamba ya wakulima waliodai kununua maeneo ndani ya sehemu zilizotengwa kwa ajili ya akiba na malisho ya mifugo katika Vijiji vya Msolwa, Kalengakelo, na Chisano.

Mmoja wa wanakijiji anayefahamika kwa jina la Utaisoma, alieleza kuwa shamba alilonunua kutoka kwa uongozi wa kijiji limeingizwa kwenye mpango wa matumizi bora ya ardhi na kuwekwa kama eneo la malisho, jambo lililopunguza uzalishaji wake.

Utaisoma alimlaumu uongozi wa kata na kijiji, akidai kuwa amemiliki maeneo hayo kwa zaidi ya miaka 16 bila kuwa na vielelezo halali vya umiliki wa ardhi hiyo.

Akijibu malalamiko hayo, Diwani wa Kata ya Kalengakelo  Martha Mkula, alisema maeneo hayo yaliuzwa na uongozi wa kijiji uliomaliza muda wake mwaka 2014 ambapo mtendaji wa kijiji alihusika katika mchakato huo.

Martha aliongeza kuwa baada ya kutenga maeneo ya malisho, waligundua kuwa mkulima mmoja amelima katikati ya eneo hilo la malisho. Alipomhoji mwenyekiti wa kijiji, alikiri kupokea shilingi milioni moja kutoka kwa Utaisoma kama malipo ya shamba hilo.

“..Nikamwambia mwenyekiti, huoni kuwa unaleta mgogoro hapa? Tumekubaliana kuwa eneo hili ni kwa ajili ya malisho, lakini wewe na vijana wako mnaenda kuuzia wakulima. Nakushauri urudishe fedha hizo, lakini hakunisikiliza. Kama angefuata ushauri wangu, tusingekuwa hapa leo.." alisema Martha.

Naye Leonard Kifanyi, mjumbe wa Serikali ya Kijiji cha Kalengakelo, aliongeza kuwa maeneo hayo awali yalikuwa chini ya Mamlaka ya Usimamizi wa Wanyama Pori (TAWA) kabla ya kurejeshwa kwa kijiji, hivyo wakapanga matumizi bora ya ardhi kwa kuyagawa kwa wakulima na wafugaji.

Licha ya mipango hiyo, baadhi ya wananchi walivamia maeneo ya malisho na kuanza shughuli za kilimo, jambo ambalo liliendelea kuzua migogoro, alisema Kifanyi.

Baada ya kusikiliza malalamiko ya wananchi na majibu ya viongozi, Kamishna Kayera aliagiza vyombo vya Ulinzi na Usalama kufanya uchunguzi wa tuhuma zinazowakabili viongozi waliotajwa na kuwachukulia hatua za kisheria iwapo watabaini ukweli.

Aidha, Kamishna Kayera alisisitiza kuwa ni wajibu wa kila mwananchi kujua taratibu sahihi za kufuata anapotaka kununua ardhi, huku akiwataka viongozi wa vijiji kuacha tabia ya kuuza maeneo kana kwamba ni mali yao binafsi.

MWISHO.