Maadhimisho ya Siku ya UKIMWI Duniani yapamba Moto.

Posted on: November 15th, 2023

Maandalizi ya Sherehe za Maadhimisho ya Siku ya UKIMWI Duniani 2023 ambayo Kitaifa yatafanyika Mkoani Morogoro yamepamba moto ambapo uzinduzi rasmi unategemea kufanyika Novemba 24 huku Mgeni rasmi wa uzinduzi huo atakuwa Mkuu wa Mkoa wa Morogoro Mhe. Adam Kighoma Malima.

Waziri wa Nchi, Ofisi ya Waziri Mkuu - Sera, Bunge na Uratibu Mhe. Jenista Mhagama akisaini kitabu cha wageni alipowasili katika Ofisi ya Mkuu wa Mkoa wa Morogoro kwa ajili ya kujadiliana na Mkuu wa Mkoa huo Mhe. Adam Kighoma Malima juu ya kufanisha sherehe ya Maadhimisho ya Siku ya UKIMWI Duniani 2023 ambayo kitaifa itafanyika Mkoani Morogoro.

Hayo yamebainishwa Novemba 15, 2023 na Waziri wa Nchi, Ofisi ya Waziri Mkuu – Sera, Bunge na Uratibu Mhe. Jenista Mhagama akiwa mkoani Morogoro na kukutana na Mhe. Adam Kighoma Malima na kujadiliana nae mambo kadha wa kadha kuhusu kufanikisha tukio hilo muhim.

Mkuu wa Mkoa wa Morogoro Mh. Adam Kighoma Malima akiwa pamoja na Waziri wa Nchi, Ofisi ya Waziri Mkuu - Sera, Bunge na Uratibu Mhe. Jenista Mhagama wakijadiliana kuhusu kufanikisha Maadhimisho ya Siku ya UKIMWI Duniani 2023 ambayo kitaifa yatafanyika Mkoani Morogoro.

Katika mazungumzo yao, Waziri Mhagama amesema, Maadhimisho hayo yanaenda sambamba na wiki ya maadhimisho ambayo itazinduliwa Novemba 24 na Mkuu wa Mkoa huo ambapo kutakuwa na makongamano ya Vijana, mijadala ya Viongozi wa dini, riadha na maonesho ya wadau mbalimbali wa mapambano dhidi ya VVU na UKIMWI.

Pamoja na maandalizi hayo Mhe. Jenista Mhagama ametoa wito kwa wananchi kuendelea kujitokeza kupima Afya zao kwa hiari na kuchukua taadhari ya maambukizi ya VVU na UKIMWI.

Kwa upande wake Mkuu wa Mkoa wa Morogoro Mhe. Adam Kighoma Malima ameishukuru Serikali kwa kuupa heshima Mkoa huo kuwa mwenyeji wa Maadhimishao hayo kitaifa na kuahidi kusimamia kwa karibu maandalizi yake hususan ya ngazi ya Mkoa ili sherehe hiyo iwe na mafanikio na matokeo lengwa.

Mkuu wa Mkoa wa Morogoro Mh. Adam Kighoma Malima, Waziri wa Nchi, Ofisi ya Waziri Mkuu - Sera, Bunge na Uratibu Mhe. Jenista Mhagama wakiwa pamoja na Wajumbe wa Kamati ya maandalizi ya Maadhimisho ya  Siku ya UKIMWI Duniani 2023 ambayo kitaifa yatafanyika Mkoani Morogoro wakikagua uwanja wa Shule ya Sekondari Morogoro ambao utatumika wakati wa Maadhimisho hayo.

Aidha, amepongeza nia ya Serikali ya kufikisha ujumbe kwa vijana kuhusu kujikinga na maambukizi ya VVU na UKIMWI ambapo utafiti unaonesha kuwa Vijana wapo kwenye hatari ya maambukizi hayo.

Maadhimisho ya Siku ya UKIMWI Duniani 2023 yanaenda sambamba na kaulimbiu inayosema “Jamii iongoze kutokomeza UKIMWI”.

MWISHO.