Morogoro yapokea washiriki wa mafunzo chuo cha NDC, RC Malima abariki ujuo wao.

Posted on: January 7th, 2025

Mkoa wa Morogoro umepokea washiriki kutoka Chuo cha Ulinzi cha NDC  huku Mkuu wa Mkoa huo Mhe. Adam Kighoma Malima akibariki ujio wao na kukishukuru chuo hicho kwa kuleta washiriki hao wanaotoka ndani na nje ya nchi na kuwahakikishia kuwa watajifunza mambo mengi ya mfano.

Washiriki hao wamewasili Mkoani humo Januari 6, 2025 wakiambatana na Wakufunzi wao na wasaidizi wengine huku Mkuu waMkoa huo Adam Malima akibainisha kuwa ziara hiyo ni mahususi kwa ajili ya mafunzo ya kiusalama katika masuala ya kiuchumi, kijamii, kisiasa na viwanda.

Amesema, katika mafunzo hayo somo kubwa ni litakuwa ni kukumbushana kuwa uongozi wa kijeshi unalenga pia masuala ya kiuchumi, kijamii na kisiasa mbapo somo hilo linasaidia kuandaa viongozi wa kijeshi watakaokuja kutumika katika mazingira nje ya jeshi kwa manufaa ya jeshi lenyewe na Taifa kwa jumla.

"..niwashukuru uongozi wa Chuo cha Ulinzi kwa kuamua kuwaleta wanafunzi wa nje na ndani ya nchi na ni matarajio yangu wataondoka Morogoro wamejifunza mambo mengi sana ya Mfano.." amesema Mhe. Adam Malima.

Kwa upande wake Mkufunzi elekezi mwanadamizi Jeshi la nchi kavu kutoka chuo cha Taifa cha Ulinzi Brigedia Jenerali  Charles James Ndiege amesema lengo la ziara katika Mkoa wa Morogoro ni kujifunza masuala ya kiusalama katika nyanja za kiuchumi, Kijamii, kisiasa na viwanda ambavyo huathiri usalama wa nchi.

Aidha amebainisha sababu kuchagua Mkoa wa Morogoro kufanyia mafunzo hayo kwa vitendo kuwa ni kwa sababu ni Mkoa unaochangia kwa asilimia kubwa upatikanaji wa chakula hapa  nchini na kuangalia mchango wa masuala ya kijamii, kiuchumi (viwanda na kilimo) katika kukuza maendeleo ya Mkoa wa Morogoro na Taifa.

Naye Mshiriki wa mafunzo hayo Bw. Said Rajabu Mndeme amesema katika ziara hiyo ya mafunzo kwa vitendo wataangazia hasa sehemu mbili ambazo ni uzalishaji katika Sekta ya kilimo na viwanda ambapo itawasaidia kujifunza mambo mbalimbali ya uzalishaji.

MWISHO.