RC MALIMA ASISITIZA UONGOZI WA HAKI, UWAJIBIKAJI NA USHIRIKIANO

Posted on: January 29th, 2025

Mkuu wa Mkoa wa Morogoro Mhe. Adam Kighoma Malima amemtaka Mkuu wa Wilaya ya Ulanga aliyeteuliwa hivi karibuni Mhe. Khamana Juma Simba kufanya kazi yake kwa haki, uwajibikaji na ushirikiano mkubwa baina yake na viongozi wengine wa serikali wa sekta zote ndani ya Wilaya yake.

Mkuu huyo wa Mkoa ametoa rai hiyo Januari 29, Mwaka huu wakati wa hafla fupi ya uapisho wa Mkuu wa Wilaya huyo iliyofanyika katika ukumbi wa Mikutano wa Ofisi ya Mkuu wa Mkoa huo na kuhudhuriwa na viongozi wa Chama na Serikali.

Mhe. Malima amsema Mkuu huyo wa Wilaya anatakiwa kufanya kazi yake kwa kufuata misingi ya uongozi wa haki, uwajibikaji, ushirikiano na kujituma katika kutekeleza majukumu yake na kufuata misingi ya uongozi ili kuleta amani na utulivu pamoja na maendeleo katika jamii.

“ukienda huko utakutana na kila aina ya watu wakubwa kwa watoto na hutakiwi kuweka ukubwa wako kwanza badala ya kuweka dhamana yako juu yao” amesema Mhe. Adam Malima

Aidha, Mhe. Adam amemtaka Mkuu huyo wa Wilaya ya Ulanga kushughulika kikamilifu kutatua migogoro ya wakulima na wafugaji inayoikabili Wilaya hiyo kwa kuzingatia maadili ya katiba na sheria za Jamhuri ya Muungano wa Tanzania.

Kwa upande wake, Kaimu Jaji Mfawidhi wa Mahakama Kuu ya Morogoro, Bw. Stephen Magoiga amemshauri Mkuu huyo wa Wilaya kufuata yale yote yaliyo kwenye katiba na kanuni za uongozi ili kutekeleza majukumu yake kwa weledi huku akisimamia sheria na uwajibikaji.

Akizungumza baada ya kula kiapo, Mhe. Simba ameahidi kushirikiana na wananchi wa ngazi zote katika kuleta maendeleo ya Wilaya ya Ulanga.

“naomba kuchukua fursa hii kuwaomba watu wa Ulanga, viongozi wezangu wa chama na Serikali, watumishi wa serikali na wananchi wote wa wilaya ya Ulanga tufanye kazi ya kuwasaidia wana Ulanga ya kuwaletea maendeleo, nina amini tukishirikiana pamoja tutafanya vizuri na kuistawisha wilaya yetu ya Ulanga” Amesema Mhe. Simba