RC MALIMA AWATAKA VIONGOZI WA DINI KUHIMIZA AMANI NA UPENDO.

Posted on: October 17th, 2024

Mkuu wa Mkoa wa Morogoro Mhe. Adam  Kighoma Malima amewahimiza viongozi wa dini  kutumia nafasi zao na  kuhubiri amani na upendo kwa waumini wao kwa lengo la kuwajenga kiimani ili kuweza kuishi kwa  kuheshimiana na kustamihiliana.

Mhe. Malima ameyasema hayo leo Oktoba 16, 2024 wakati akiongea na viongozi wa dini wa Wilaya ya Kilombero mkoani Morogoro ikiwa ni ziara yake ya kikazi ya siku mbili Wilayani Ulanga, Malinyi na Kilombero.

Aidha Mhe. Malima  amewasisitiza viongozi hao kushiriki katika kujiandikisha katika daftari la wapiga kura ili kukidhi matakwa ya kuchagua na kuchaguliwa katika Uchaguzi wa Serikali za Mitaa utakaofanyika Novemba 27, 2024 na kupata viongozi walio na manufaa kwa Jamii na Serikali kwa kipindi cha miaka mitano ijayo.

Pia Mhe. Adam Malima amewashukuru viongozi hao wa dini kwa kushiriki na kufanikisha Ziara ya Mhe. Dkt. Samia Suluhu Hassan Rais wa Jamhuri ya Muungano wa Tanzania wakati wa Ziara yake ya kikazi Mkoani Morogoro.

Kwa upande wao viongozi wadini  wamempongeza Mkuu huyo wa Mkoa kwa uongozi ulio tukuka na kumshukuru kwa  kutenga muda wa kukutana  nao na kumuahidi kuendelea kuliombea Taifa, kutunza amani na kutoa ushirikiano Kwa Serikali katika zoezi la Uchaguzi wa Serikali za Mitaa.

MWISHO.