RUWASA NENDENI MKALITENDEE HAKI HILI GARI - RC MALIMA.

Posted on: October 24th, 2024

Mkuu wa Mkoa wa Morogoro Mhe. Adam Kighoma Malima ameitaka Mamlaka ya Maji Safi na Usafi wa Mazingira Vijijini (RUWASA) kulitumia vyema gari jipya katika kuyafikia maeneo yote ya miradi ya maji ambayo hapo awali yalikuwa hayafikiki kutokana na upungufu wa magari katika mamlaka hiyo ya Wilaya ya Malinyi.

Mhe. Malima amebainisha hayo Oktoba 24, Mwaka huu wakati wa tukio la kukabidhi gari jipya kwa RUWASA lililofanyika katika ukumbi wa mikutano wa Ofisi ya Mkuu huyo wa Mkoa.

Aidha, Mhe. Adam amesema lengo kubwa la kukabidhi gari hilo Wilayani humo ni kutokana na upungufu wa magari kwa RUWASA  kushindwa kufika kukagua miradi ya maji inayotekelezwa Wilayani humo, hivyo ameitaka mamlaka hiyo kwenda kufanya kazi kwa bidii na kulitumia gari hilo kwa lengo kuwaondolea wananchi adha ya maji.

".. watu wa idara ya maji, Mkurugenzi na viongozi wengine mkalitendee haki kwa matumizi ya gari hili kuweza kuifikia miradi na maeneo yote ya Malinyi na kutatua changamoto za maji..." Amesisitiza Mhe. Adam Malima

Pia Mkuu huyo wa Mkoa amemshukuru Rais wa Jamhuri ya Muungano wa Tanzania Mhe. Dkt. Samia Suluhu Hassan  kwa kuwatazama Wananchi wa Wilaya ya Malinyi Mkoa wa Morogoro kwa kuwaletea gari kwa ajili ya RUWASA ili kuwatumikia wananchi hasa kutatua changamoto za maji.

Kwa upande wake, Mhandisi Sospeter Lutonja Meneja wa RUWASA wa Mkoa wa Morogoro amesema kupitia Serikali ya awamu ya sita  inayoongozwa na Mhe. Dkt. Samia Suluhu Hassan Rais wa Jamhuri ya Muungano wa Tanzania Mkoa huo umeendelea kupokea fedha za miradi ya maji ambapo kwa sasa  miradi 64 inaendelea yenye thamani ya shilingi Bilioni 89.

Ameendelea kwa kusema moja ya changamoto wanayoipata watendaji wa RUWASA waliopo ngazi za Wilaya ni upungufu wa magari ambapo inawapelekea kushindwa kufika katika miradi ya maji hivyo amemshukuru Mhe. Rais kwa kuwaona Wananchi wa Malinyi na kuweza kutoa gari ambapo itaenda kuondoa changamoto za maji kwa wananchi.

MWISHO.