SERIKALI MKOANI MOROGORO KUTOA USHIRIKIANO KWA GYMKHANA KLABU.

Posted on: June 14th, 2024

Serikali Mkoa Morogoro kupitia Ofisi ya Mkuu wa Mkoa huo inayoongozwa na  Mhe. Adam Kighoma Malima imetoa ahadi kwa Gymkhana Klabu ya morogoro kuwa itatoa ushirikiano mkubwa  katika kuandaa mashindano yajayo ya gofu ili kuweza kuvutia wageni wengi zaidi na kuongeza thamani ya mchezo huo katika Mkoa huo.

Ahadi hiyo imetolewa na Mhe. Malima  Juni 14, 2024 wakati akifungua rasmi mashindano  ya Alliance one  Morogoro Open Golfu 2024 ambayo yanafanyika ndani ya siku tatu kuanzia Juni 14 hadi 16 mwaka  huu katika viwanja ya Gymkhana vilivyopo Halmashauri ya Manispaa ya Morogoro.

Mkuu huyo wa Mkoa amesema kupitia ufunguzi wa mashindano hayo yanaenda kuwa chachu ya kuwavutia wageni wengi kwa sababu ya uwepo wa mazingira mazuri ya hali ya hewa na uwanja mzuri wa kuchezea mchezo huo pia wageni hao baada ya kucheza mchezo huo wanaweza kwenda kutembelea vivutio vya utalii vikiwemo mbuga za wanyama, kuangalia maporomoko ya maji na vivutio vingine.

".... Ahadi yangu kwenu ni kwamba Ofisi ya Mkuu wa Mkoa itaenda kushirikiana na Gymkhana na wadau wote ili kufanya mashindano yajayo yawe makubwa zaidi kuliko haya...." Amesema Adam Malima.

Kwa upande wake Dickson Sika Mwenyekiti wa Morogoro Gymkhana Club amesema  timu zote kutoka Tanzania na Nje ya Tanzania zimejitokeza kwa wingi katika mashindano hayo ambazo zikiwemo timu za watoto kutoka Kambi ya Jeshi Lugalo, timu ya Gymkhana Morogoro na timu kutoka TPC Moshi.