Wakulima Malinyi watakiwa kuuza mazao kwa mfumo wa stakabadhi gharani.

Posted on: June 6th, 2023

Mkuu wa Mkoa wa Morogoro Mh. Adam Malima akiangalia hali ya zao la mahindi Wilayani Malinyi.

Wananchi wa Wilaya ya Malinyi wametakiwa kuuza mazao yao hususan zao la ufuta kwa kutumia mfumo wa stakabadhi Gharani kwa lengo la kumsaidia mwananchi kutonyonywa na wafanyabiashara wasiowaaminifu wanaonunua zao hilo kwa bei ya chini hivyo kumletea mkulima umaskini.

Agizo hilo limetolewa na Mkuu wa MKoa wa Morogoro Mhe. Adam Kighoma Malima Juni 5 mwaka huu wakati wa ziara yake ya kikazi ya  kutembelea miradi ya maendeleo na kusikiliza kero za wananchi kwa Halmashauri zote tisa za Mkoa huo.

Hapa Mhe. Adam Malima (wa kwanza kushoto) akimsikiliza mtaalamu wa kilimo.

Siku ya kwanza ya ziara hiyo akiwa Wilayani Malinyi Mhe. Adam Malima amekutana na kile wananchi wanachokiita kero ya kuuza zao la ufuta kwa mfumo wa stakabadhi gharani huku baadhi yao wakionesha ama kutouelewa vema umuhim wake au wachache wamerubuniwa na wafanyabiashara kutoupokea utaratibu huo kwa maslahi yao binafsi.

kwa sababu hiyo, Mkuu huyo amewataka wakulima wa Wilaya hiyo kufuata mfumo wa stakabadhi gharani wanapouza zao hilo lengo ni kumnyanyua mkulima mdogo na sio kumnyonya kwani amesema kwa mfano bei ya zao hilo kwa siku ya Juni 7, 2023 kupitia mfumo huo ni shilingi 3,400 kwa kilo moja badala ya shilingi 2,800 kwa kilo moja kwa kuuza nje ya utaratibu huo.

"sasa mimi wajibu wangu kama Mkuu wa Mkoa ni kuhakikisha kuwa mkulima yule ambaye anaingizwa usiku nimlinde... mimi ninachotaka kwamba mtu atakapoenda kununua ufuta aangalie bei ambayo mkulima angepata kwenye stakabadhi gharani ampe hiyo" amesisitiza Mhe. Adam Malima.

Mkuu wa Mkoa wa Morogoro Mhe. Adam Malima alipata nafasi ya kukagua miundombinu ya barabara Wilayani humo.

Katika hatua nyingine, akiwa bado Wilayani humo Mkuu wa Mkoa amemwagiza Mkurugenzi Mtendaji wa Halmashauri ya Malinyi kumtaka Afisa Kilimo wa Wilaya hiyo kutoa Elimu ya Kilimo chenye tija kwa wananchi wake badala ya kuwaacha kuendelea na kilimo cha mazoea na kisicho na tija katika uzalishaji huku akishangaa namna ardhi nzuri na yenye rutuba iliyopo Wilayani humo kutotumika ipasavyo.

Aidha, Mhe. Adam Malima amewataka wananchi wa Malinyi kuacha migogoro isiyo na faida na kumsababisha yeye kuhangaika na mambo madogo badala ya kushughulikia mambo makubwa kama masuala ya barabara ambayo kwake amesema ni kipaumbele cha kujenga hoja ili kuondoa kero hiyo inayosababisha wananchi kukwama njiani na kuwacheleweshea maendeleo yao.

MWISHO.