Wizara ya Sheria kuanza kampeni ya msaada wa kisheria Mkoani Morogoro.

Posted on: December 10th, 2024

Wizara ya Katiba na Sheria kwa kushirikiana na Mkoa wa Morogoro, inatarajiwa kuanza Kampeni ya Msaada wa Kisheria ya Mama Samia kwa lengo la kusogeza karibu huduma hiyo ikiwemo utoaji wa Elimu inayohusu masuala ya haki na sheria na kutatua kero mbalimbali zinazowakabili wananchi wa Mkoa huo.

Kampeni hiyo inatarajiwa kuzinduliwa rasmi Disemba 13, Mwaka huu katika eneo la stendi ya daladala ya zamani iliyopo Manispaa ya Morogoro  na baada ya uzinduzi wa kampeni hiyo itaendelea kufanyika katika Halmashauri zote za Mkoa huo kwa siku 10 mfululizo ikiwa na lengo la  utoaji elimu kuhusu masuala mbalimbali ya kisheria kama vile Ardhi, Haki za Binadamu na Utawala Bora, Mirathi, Ndoa, Ukatili wa Kijinsia, Madai, Jinai vilevile itahusisha huduma ya usajili na utoaji vyeti vya kuzaliwa na kifo vitakavyotolewa na RITA.

Ratiba iliyotolewa inaeleza kuwa, mara baada ya uzinduzi huo kampeni itaendelea kwenye  ngazi ya Halmashauri ambapo itafanyika kwa kata 10 na vijiji 30 kwa kila Halmashauri ikigusa moja kwa moja kutatua  changamoto za wananchi hususan masuala ya kijinsia, migogoro ya ardhi, mirathi na utoaji wa Elimu ya haki za binadamu kwa ujumla.

Kampeni hiyo ya Mama Samia inaongeza uelewa wa kisheria na haki za binadamu ndani ya jamii ikiwemo haki za wanawake na watoto, huduma ya  ushauri  wa kisheria na unasihi kwa waathirika wa ukatili wa kijinsia pia kuongeza uelewa kwa wananchi kuhusu wajibu na misingi ya utawala bora.

Kampeni hiyo inachangia uboreshaji na upatikanaji wa haki kwa makundi mbalimbali wakiwemo wanawake, watoto na makundi mengine yaliyo katika mazingira hatarishi pamoja na kuimarisha amani na utulivu, kuongeza kipato na  kuleta utengamano wa kisiasa hapa nchini.

Ikumbukwe kuwa Mkoa wa Morogoro ni miongoni mwa Mikoa yenye migogoro lukuki inayohusu ardhi na migogoro mingine, hivyo, wananchi mnaombwa kushiriki kwenye kampeni hiyo na kushiriki kwa wingi ili wataalam waliopo kwenye kampeni hiyo waweze kutatua kero na migogoro inayowakabili.

Mwisho.